J-Lo leikur ekki Sue Ellen

Jennifer Lopez mun ekki leika í fyrirhugaðri kvikmynd sem byggð verður á sápuóperunni um Ewing-fjölskylduna í Dallas. J. Lo átti að leika hina drykkfelldu Sue Ellen en John Travolta átti að leika eiginmann hennar, olíubaróninn JR Ewing.

Jen mun ekki leika í Dallas, sagði Leslie Sloane Zelnick, talsmaður leik- og söngkonunnar, í samtali við blaðið Star en gaf ekki nánari útskýringu á því hver ástæðan væri.

Þær sögusagnir ganga nú fjöllum hærra í Hollywood að Jennifer sé ólétt og eftir að hún hætti við tónleikaferðalag um Evrópu og Asíu fékk sá orðrómur byr undir báða vængi.

Það hefur ekki gengið þrautalaust að ráða fólk til starfa í Dallas-myndina því Robert Luketic hætti við að taka við leikstýra myndinni. Hann bar fyrir sig listrænan ágreining við framleiðendur myndarinnar. Luketic og Lopez unnu saman að myndinni Monster-In-Law.

Gurinder Chadha mun leikstýra Dallas en hann leikstýrði myndinni Bend It Like Beckham sem skaut Keiru Knightley upp á stjörnuhimininn.

Kvikmyndaframleiðendurnir standa því frammi fyrir nokkrum alvarlegum vanda því Sue Ellen var ein af burðarásunum í söguþræði hinna vinsælu þátta. Aðdáendur þáttanna eru þó flestir mjög ánægðir með þessa ákvörðun Jennifer Lopez því fæstir þeirra gátu séð hana fyrir sér í þessu hlutverki.