Að glugga rafrænt í útgefin rit

Bandaríska útgáfufélagið HarperCollins hefur nú stigið skref í átt til enn frekari rafvæðingar bókmenntanna því í gær var opnað fyrir þjónustu á heimasíðu fyrirtækisins þar sem forvitnir lesendur geta gluggað rafrænt í bækur félagsins. Lesendur geta kíkt á fyrstu þrjár síður flestra kaflanna en nú eru 135 titlar eftir 10 höfunda aðgengilegir á síðunni en þar á meðal eru verk eftir Michael Crichton og Paulo Coelho

Í viðtali við The New York Times segir Brian Murray, innanbúðarmaður hjá forlaginu, að bókaiðnaðurinn hafi dregist aftur úr tónlistar- og kvikmyndaiðnaðinum sem hafa markvisst nýtt sér nútímatækni til þess að kynna vörur sínar og þjónustu. Með því að bjóða lesendum upp á að glugga starfrænt í bækurnar vonast þau til að ná til yngri markhóps sem ekki sækir bókabúðir jafn grimmt og hinir eldri og vitanlega til selja fleiri eintök.

Fyrirtækið HarperCollins hefur verið í fremstu röð þegar kemur að stafrænni útgáfu en fyrirtækið hefur þegar fært 10.000 af útgefnum ritum sínum fyrir á starfrænt form og hyggst gera slíkt hið saman við þær 15.000 bækur sem eftir eru.