Túrnum lýkur í kvöld

Tónleikaferð Sigur Rósar um landið lýkur í dag. Sveitin hefur farið víða um land síðustu tvær vikurnar og alls leikið á átta tónleikum. Í gær lék Sigur Rós á tvennum tónleikum, þeir fyrri voru á Kárahnjúkasvæðinu um hádegið og um kvöldið lék sveitin á Seyðisfirði. Hápunktur tónleikaferðarinnar var án efa síðastliðið sunnudagskvöld þegar vel yfir 15 þúsund manns sóttu tónleika Sigur Rósar á Miklatúni í Reykjavík. Allir tónleikarnir, og ýmislegt sem á daga sveitarinnar hefur drifið síðustu daga, hefur verið fest á filmu. Liðsmenn Sigur Rósar áætla að nota afraksturinn á væntanlegan DVD-disk. Lokatónleikar ferðarinnar eru í Ásbyrgi í kvöld.