Útvarpsþáttur á hvíta tjaldinu

A Prairie Home Companion fjallar um samnefndan útvarpsþátt sem hefur verið í gangi í samfellt þrjátíu ár. Um er að ræða þátt af gamla skólanum þar sem Garrison Keller fer fyrir flokki hæfileikaríkra tónlistarmanna og skemmtir hlustendum með bæði söng og gamanmáli. Kvikmyndin er lögð útaf þættinum og fjallar um síðasta kvöldið sem þátturinn fer í loftið.

Auðmaðurinn Axman hefur fest kaup á útsendingarstaðnum og ætlar sér að drepa þessa risaeðlu sem þátturinn er að hans mati. Áhorfendur fá að skyggnast á bak við tjöldin og kynnast þeim fjölda fólks sem gerði A Prairie Home Companion nánast ódauðlegan.

Mikill fjöldi stórleikara kemur við sögu í þessari nýjustu afurð Robert Altman og nægir þar að nefna Lily Tomlin, John C. Reilly, Meryl Streep og Kevin Kline auk Garrison Keller sem leikur sjálfan sig en hann kom einmitt hingað til Íslands á vegum listahátíðarinnar í Reykjavík. Frábær tónlist prýðir myndina sem hefur fengið fyrirtaksdóma í erlendum miðlum.