Eiginmaðurinn þolir ekki tónlist Madonnu

Söngkonan vinsæla Madonna segir að eiginmaður sinn Guy Ritchie þoli ekki tónlistina sína. Þetta kemur m.a. fram í nýlegu viðtali hennar við franskt tímarit.

Madonna segir að börnin sín tvö, hin níu ára Lourdes og Rocco sem er sex ára, séu einu fjölskyldumeðlimirnir sem virkilega kunni að meta tónlistina hennar. „Börnin mín dýrka allt sem ég geri, þau elska danstónlist. Maðurinn minn er ekki mikill aðdáandi minn," sagði Madonna.

Í viðtalinu viðurkennir hún jafnframt að fjölskyldulífið og frægðin hafi sína galla. „Vitaskuld er leiðinlegt að hafa ekki lengur frelsi til að fara ein á skemmtistað og dansa alein á dimmu dansgólfi án þess að nokkur komi til að trufla mig," sagði hún. „Það er leiðinlegt að geta ekki lengur hagað sér á þennan hátt."

Madonna bætti við: „Í síðustu viku fór ég á klúbb þar sem ég dansaði við marga vini mína. Það var mjög gaman. Stundum fer ég líka út að dansa með nokkrum af dönsurunum mínum. Að sjálfsögðu ekki á hverju kvöldi, enda á ég fjölskyldu sem ég þarf að sinna."

Aðspurð hvort hún vilji frekar fara út að skemmta sér í miklu stuði heldur en að vera heima segir Madonna að valið sé auðvelt. „Þeim litla frítíma sem ég á eyði ég með börnunum mínum. Við horfum á DVD, pöntum pitsu og stundum fer ég á hestbak með dóttur minni. Kannski hljómar þetta leiðinlega en svona er lífið hjá mér. Tímarnir hafa breyst," sagði hún.

Madonna, sem er 48 ára, segist líta á sig sem kamelljón. „Ég get verið eins og ensk sveitafrú en sekúndubroti get ég breytt mér í Oliviu Newton John eða Farrah Fawcett."