Kvikmyndaveislurnar hefjast

Á næstu mánuðum verða kvikmyndahúsin laus við alla Hollywood-stælana og markaðsetningu því á haustmánuðum gefst borgarbúum tækifæri til sækja tvær ólíkar kvikmyndahátíðir sem báðar náðu að festa sig í sessi á síðasta ári.

Reykjavik Film Festival og Iceland International Festival hafa ákaflega ólík markmið. Hinn fyrrnefnda sækir í listrænar myndir og hugsar kvikmyndina eins og listaverk. IFF-hátíðin, með Ísleif B. Þórhallsson í fararbroddi, fékk metfjölda gesta á hátíðina hjá sér í fyrra og þekktir leikarar og leikstjórar á borð við Walter Salles og Gael Garcia Bernal komu hingað til lands á vegum IFF.

Einstakar kvikmyndir

Í fyrstu leit allt út fyrir að þessar tvær hátíðir yrðu í samkeppni hvor við aðra en þær voru báðar haldnar á haustmánuðum í fyrra. Nú hefur hins vegar því verið lýst yfir að þetta sé í síðasta skipti sem þessi háttur verður hafður á; IFF verður framvegis á vorin og Reykjavík Film Festival á haustin.

Að sögn Hrannar er hlutverk Reykjavik Film Festival að bjóða Íslendingum upp á það besta og ferskasta úr alþjóðlegri kvikmyndagerð. „Sannleikurinn er sá að hundruð frábærra mynda eru aldrei sýnd hérlendis og alþjóðleg kvikmyndahátíð í Reykjavík vill verða vettvangur fyrir þessar myndir," útskýrir Hrönn. „Enn fremur er ætlunin að koma Reykjavík á kortið sem alþjóðlegri kvikmyndahátíðarborg þar sem kvik­myndaunnendur frá öllum heimshornum geta gengið að vandaðri dagskrá," segir Hrönn.

Reykjavik Film Festival kaupir ekki sínar myndir heldur fær þær að láni. „Kvikmyndahátíðin er því eina tækifærið sem gefst til þess að sjá þessar myndir því fæstar þeirra munu halda áfram í bíó eða birtast á myndbandaleigum," segir Hrönn.

Gestum kvikmyndahátíðarinnar gefst kostur á að gera meira en að fara bara í bíó því boðið verður upp á námskeið í kvikmyndalestri, málþing um mannréttindi en hápunktur hátíðarinnar verður þó eflaust þegar Reykjavík verður myrkvuð á opnunarkvöldið. Viljum bæta bíómenninguna

Að sögn Ísleifs B. Þórhallssonar er meginmarkmið IFF-hátíðarinnar að auka úrval kvikmyndahúsanna og bæta bíómenningu landans. „Við viljum skemmta fólki og ná til breiðari hóps en stundar bíóin venjulega," útskýrir Ísleifur. Hann segir að úrvalið á IFF-hátíðinni sé mjög breitt og hátíðin sýni í raun hvað sem er, svo lengi sem myndin sé góð og áhugaverð. „Við höfum enga fyrirfram ákveðna formúlu til að velja inn myndirnar og tökum bara það besta sem er í boði á hverjum tíma," útskýrir hann.

Eitt aðalsmerki IFF í fyrra voru hinir góðu gestir sem sóttu landið heim. Árið í ár er engin undantekning. „Matt Dillon og Marisa Tomei koma bæði vegna opnunarmyndarinnar og þá reiknum við einnig með því að fleiri góðir gestir komi á vegum hátíðarinnar," segir Ísleifur. „Í kringum allar gestakomur verða glæsilegar galasýningar með tilheyrandi veisluhöldum en auk þess verður um nokkrar íslenskar frumsýningar að ræða," útskýrir Ísleifur og segir að jafnframt verði boðið upp á námskeið í handritagerð og fyrirlestra með kvikmyndasafnaranum og grúskaranum Jack Stevens. - fgg