Í samkeppni við Evian

Ég tók þátt í almennri keppni fyrir skólann og lenti í öðru sæti þannig að ég bjóst aldrei við neinum verðlaunum, segir Tinna Pétursdóttir umbúðahönnuður en hönnun hennar á vatnsflösku úr gleri var valin til framleiðslu á Ítalíu af fyrirtækinu Norda sem er stærsta vatnsframleiðsla þar á landi. Tinna er útskrifuð með BA í grafískri hönnun og tók mastersnám í umbúðarhönnun frá Mílanó og ekki er langt síðan hún flutti heim.

Þessa stundina er hún í barneignarfríi en mun hefja störf innan skamms hjá Jónsson & Lemacks auglýsingastofunni þar sem hún mun sjá um umbúðahönnun fyrir fyrirtæki á borð við 66° norður og allskyns matvæli.

Þetta er einstakt tækifæri fyrir mig en flaskan mun aðeins vera seld á fínum veitingahúsum og kaffihúsum. Þetta er lítil 75 cl flaska sem mun vera í samkeppni við Evian og Sanpellegrino en þeir eru stærstu vatnsframleiðendurnir í heiminum, segir Tinna og bætir því við að ef flaskan selst vel þá mun hún vera framleidd til útrásar í Bandaríkjunum.

Hún segist auðvitað hafa grætt eitthvað á þessu og segist hafa gert góðan samning við Norda fyrirtækið. Tinna hefur þó ekki hug á því að setjast að á Ítalíu enda fullyrðir hún að heima sé best.