Vörur varnarliðsins dýrari en fólk hélt

Nokkur fjöldi fólks var saman kominn í gamla Blómavalshúsinu í Sigtúni í gær þegar sala á eigum Varnarliðsins hófst þar. Á boðstólnum var allt milli himins og jarðar, sófasett, rúm, stólar, tölvur og handlóð svo fátt eitt sé nefnt. Viðmælendur Fréttablaðsins voru flestir sammála um það að vörurnar væru dýrari en þeir höfðu búist við en flestum leist þó vel á þær.

Jón Páll Eyjólfsson hafði fest kaup á stól fyrir sjö þúsund krónur þegar blaðamaður náði tali af honum. Það er bara fínt að herinn skuli vera að fara, bara æðislegt og við getum komið og keypt allt draslið, það er ennþá betra. Það er líka gaman að styrkja bandaríska herinn svona í lokin, ekki veitir þeim af, þeir eru í stríðsrekstri og það er dýrt. Þetta er mitt framlag til stríðsrekstrarins sagði Jón.

Þau Bergþóra Jóhannsdóttir og Björn Olsen sögðust fyrst og fremst að vera að forvitnast en væru ekki í kauphugleiðingum. Við erum bara að forvitnast, eins og meiri parturinn sennilega af fólkinu sagði Bergþóra, það getur vel verið að augað grípi eitthvað, það er alltaf þannig bætti Björn við. Þeim leist ágætlega á vörurnar en sögðu eins og svo margir að verðið væri nokkuð hærra en þau höfðu búist við.

Ástvaldur Óskarsson stendur fyrir sölunni en hann hefur þegar losað tuttugu gáma og býst við nýrri sendingu hálfsmánaðarlega. Í samtali við Fréttablaðið sagði Ástvaldur söluna ganga vonum framar og að hann væri búinn að selja heilmikið. Það er nánast allur tölvubúnaður farinn, síðan er það náttúrulega húsgögnin, kommóðurnar, verkfæraskápar og fleira.

Salan stendur í hálft ár en hún verður opin alla daga vikunnar.