Dóttir bæjarfulltrúans skírð Rósa

Stúlkunni sem Margrét Gauja Magnúsdóttir, bæjarfulltrúi Samfylkingarinnar, átti í anddyrinu heima hjá sér fyrir rúmri viku var gefið nafnið Rósa.

„Ég á mjög kæra vinkonu sem heitir Elínrós en er kölluð Rósa. Rósa litla heitir því í höfuðið á henni enda er þetta rosalega fallegt nafn,“ segir Margrét Gauja, stolt af yngri dóttur sinni. „Kannski á Oddur bróðir minn líka sinn þátt í nafninu því hann vildi ekki bekenna nafnið á eldri dóttur okkar, Björk, og kallaði hana Rósu hálft ár á eftir. Kannski nafnið hafi síast inn þá.“

Eins og fram kom í Fréttablaðinu fyrir skömmu lá Rósu litlu svo rosalega á að komast í heiminn að hún fæddist í forstofunni heima hjá sér. Davíð Arnar Stefánsson, pabbi Rósu litlu, tók á móti henni en hann naut dyggrar aðstoðar frá Neyðarlínunni.

Magrét Gauja segir að Rósa litla dafni vel. „Hún er alveg yndis­leg og það gengur allt eins og í sögu. Annars er Rósa kannski líka skírð í höfuðið á Rósu Guðbjartsdóttur, því hún á dóttur sem heitir Margrét. Það má því segja að við séum kvittar,“ segir Margrét Gauja hlæjandi.