Annar ættliðurinn í búningamálum Stuðmanna

„Nei, við erum ekki arftakar Stuðmanna,“ segir Ragnar Kjartansson, söngspíra glysrokksveitarinnar Trabant, en í kvöld verður æði sérstakt sveitaball í reiðhöll sem staðsett er milli Hveragerðis og Selfoss og hefur hlotið nafnbótina Suðurlandsskjálftinn 2006. Hljómsveitirnar Stuðmenn og Trabant taka þar höndum saman og skella upp miklum dansleik en tónleikarnir eru lokahnykkurinn á ferð Stuðmanna um landið

„Þeir eru auðvitað stórkostlegir og ein besta íslenska stofnunin,“ lýsir Ragnar yfir og bætir því að Trabant sé vissulega undir áhrifum frá gömlu „Stuðmannarugli“ eins og hann kemst að orði. „Stuðmenn eru áhrifamikil hljómsveit,“ segir Ragnar og bætir því að nokkur spenningur ríki í herbúðum hljómsveitarinnar enda eru þeir ekki vanir að spila á alvöru sveitaballi. Herlegheitin hefjast á miðnætti og hafa Stuðmenn brugðið á það ráð að bjóða íbúum norðaustur- og vestur kjördæmi frítt á tónleikana en það eina sem þeir þurfa að gera er að framvísa skilríkjum sem sanna búsetu þeirra þar.

Stuðmenn hafa vakið þó nokkra athygli fyrir þá gestasöngvara sem hafa fylgt þeim á leið um landið og nægir þar að nefna Valgeir Guðjónsson og Stefán Karl Stefánsson. Ragnar ber þann draum með sér í brjósti að þeir Trabant-liðar geti einnig boðið gestum dansleiksins upp á viðlíka stjörnur. „Kannski tekur Íþróttaálfurinn eða Magni lag með okkur,“ segir Ragnar og hlær en útilokar ekki að hann muni stíga á stokk með Stuðmönnum seint um kvöldið. „Það getur allt gerst,“ segir hann.

Þótt Trabant og Stuðmenn hafi ekki komið fram saman áður eru Ragnar og fjölskylda hans ekki alls ókunnug hljómsveit Íslands. Ragnar hannaði búninga og sviðsmynd Stuðmanna en faðir hans, Kjartan Ragnarsson, er ansi nátengdur Stinna stuð sem flestir Íslendingar ættu að kannast við úr kvikmyndinni Með Allt á hreinu. Stinni klæddist þar ansi skrautlegum búningum en þeir voru allir fengnir frá Þjóðleikhúsinu og eiga ættir sínar að rekja til Kjartans, sem hafði klæðst þeim á sviði. Það má því með sanni segja að hringurinn lokist í kvöld þegar Trabant og Stuðmenn trylla Sunnlendinga.