Segir landsmótið það besta allra tíma

Framkvæmd og gott skipulag þessa móts gerir það að besta landsmóti allra tíma, segir Hulda Geirsdóttir fjölmiðlafulltrúi Landsmóts hestamanna. Hún þakkar þennan góða árangur þrotlausri vinnu frábærs starfsliðs.

Sérstaklega vil ég nefna björgunarsveitarmennina og lögregluna sem hafa verið mjög sýnilegir, segir Hulda og bætir við að hestarnir hafi einnig slegið í gegn og gert mótið einstakt. Þar ber af ótrúleg geta hjá ungum hrossum, heimsmet sem hafa verið sett og spútnikkeppendur sem komið hafa fram sem er alltaf líflegt og skemmtilegt, segir Hulda.

Veðrið lék við gesti fyrir utan nokkra rigningardropa sem féllu síðasta daginn. Þegar kom að lokaatriði mótsins sem er úrslitakeppni í A-flokki gæðinga, læddi sólin sér í gegnum skýin og gladdi mótsgesti.

Á Vindheimamelum voru um ellefu þúsund manns þegar mest lét. Vel tókst að halda friðinn meðal fólksins. Hestamót eru ekki lengur neinar sukkhátíðir, segir Ólafur Ásgeirsson aðstoðaryfirlögregluþjónn á Akureyri sem hefur haft umsjón með löggæslu á landsmótinu og verið við löggæslu á mörgum hestamótum. Þetta hefur gengið alveg ótrúlega vel.

Fimmtudags- og föstudagskvöldin voru bara mjög fín en aðeins meira að gera aðfaranótt sunnudags, segir Ólafur, nokkuð var um stympingar en ekkert sem ekki varð ráðið við. Nokkrir voru teknir vegna ölvunar við akstur um helgina en lögreglan tók mörg hundruð manns í tékk.

Þrátt fyrir að vel hafi tekist til er alltaf hægt að gera betur. Við munum fara yfir öll atriði eftir mótið en það er ekkert eitt sérstakt sem stingur, segir Hulda sem telur of snemmt að segja hvort mótið beri sig fjárhagslega. Ef við sleppum nokkurn veginn á sléttu erum við sátt, segir hún.