Kallar á algjöra endurskoðun

Bæjarráð Akureyrar hefur samþykkt að Akureyrarbær dragi sig úr Sorpeyðingu Eyjafjarðar frá næstu áramótum.

Okkur hefur þótt ganga fremur hægt að ná þeim árangri í þessum málaflokki sem við hefðum viljað sjá. Allar meiriháttar samþykktir þurfa að fara fyrir allar sveitarstjórnir hér á svæðinu og það gerir samlagið þungt í vöfum, segir Hermann Jón Tómasson, formaður Bæjarráðs Akureyrar.

Öll urðun sorps á vegum samlagsins er nú gerð í Glerárdal í landi Akureyrarbæjar og því ljóst að úrsögn Akureyrarbæjar hefur áhrif á sorpmál hinna sveitar­félaganna sem að samlaginu standa.

Þetta kom okkur auðvitað í opna skjöldu og hlýtur að hafa þær afleiðingar að þessi mál verði öll hugsuð upp að nýju, segir Svanfríður Jónasdóttir, bæjarstjóri í Dalvíkurbyggð.

Það hefur legið fyrir að þessi mál þyrfti að skoða í heild, en ég held að enginn hafi búist við að svona stórt skref yrði stigið, án samráðs við aðra aðila samlagsins. Þetta er einhliða ákvörðun Akureyringa og við heyrum fyrst af þessu í fjölmiðlum. Það þykja okkur mjög sérkennileg vinnubrögð, segir Svanfríður.

Akureyringar hyggjast leita samstarfs við fyrirtæki í atvinnulífinu á svæðinu um stofnun félags um sorpeyðingu.