Rigningarsöngur Kellys bestur

Kvikmyndin Singin' in the Rain hefur verið valin besta söngvamynd allra tíma af Bandarísku kvikmyndastofnuninni AFI.

Myndin skartar meðal annars Gene Kelly í hinu goðsagnakennda atriði þar sem hann dansar í rigningunni. Í öðru sæti lenti West Side Story með Natalie Wood í aðalhlutverki en myndin er lauslega byggð á Rómeó og Júlíu eftir William Shakespeare. Galdrakarlinn í Oz með Judy Garland í broddi fylkingar vermdi þriðja sætið en næst á eftir komu The Sound of Music frá árinu 1965 þar sem Julie Andrews fer á kostum í hlutverki barngóðu fóstrunnar Maríu og Cabaret með Lizu Minnelli í aðalhlutverki.