Býr til teiknimyndir

George Lucas, leikstjóri Stjörnustríðsmyndanna, er að búa til teiknimyndaseríuna Clone Wars sem er væntanleg í sjónvarp á næsta ári.

Teiknimyndin gerist á þeim tíma þegar lýðveldið á í borgarastyrjöld gegn aðskilnaðarsinnum sem lúta stjórn greifans Dooku.

Lítið var fjallað um þetta tímabil í Stjörnustríðsmyndunum og því segist Lucas vera spenntur að takast á við verkefnið. Þarna eru allar helstu persónurnar eins og Anakin Skywalker og Obi-Wan Kenobi. Leikararnir sem fóru með hlutverk þeirra í kvikmyndunum munu þó ekki ljá persónunum rödd sína í teiknimyndinni.

Teiknimyndaserían er nokkurs konar framhald annarrar Stjörnustríðsseríu sem var sýnd í 25 þáttum á sjónvarpsstöðinni Cartoon Network á árunum 2003 til 2005. Í nýju þáttaröðinni var aftur á móti notuð flottari tækni við gerð hennar.

Auk teiknimyndarinnar er Lucas að vinna að fjórðu Indiana Jones-myndinni. Við erum að vinna að henni. Við höfum ekki ákveðið hvernig handritið á að vera ennþá, sagði hann.