Tíguleg uppgjöf fyrir efninu

Myndlistarmaðurinn Ragnar Kjartansson hefur tilkynnt með formlegum hætti að verki hans sem kennt er við stúku Hitlers sé lokið og hann muni ekki, eins og lýst hafði verið yfir, "eiga við né endurbyggja" verkið frekar.

Leifar af leikhússtúku Adolfs Hitlers sem reist var í Admirals Palast leikhúsinu í Berlin árið 1941 voru fluttar í húsakynni Listasafns Reykjavíkur í Hafnarhúsi þar sem Ragnar hugðist fremja gjörning í tengslum við rústirnar en hann vinnur iðulega með sína eigin nærveru í verkum sínum. "Nú þegar komið er að því að hefja þennan gjörning hefur efnið yfirtekið upphaflega áætlun mína," segir í yfirlýsingu listamannsins, sem líkti sigraðri stúkunni við verkið "Skipbrot vonar" eftir Caspar David Friedrich. "Efnið sem er í þessu verki er það þungt og merkingarhlaðið að verkið sjálft hefur borið listamanninn Ragnar Kjartansson ofurliði. Ég gefst upp fyrir efninu og andanum í þessu verki."

"Þetta er tignarleg uppgjöf," útskýrði Ragnar í viðtali og áréttaði einig að hann hafi áður upplifað þessa kennd. "Það er algengt að verki sé lokið fyrr en maður heldur." Ragnar órar ekki fyrir hvort aðrir gestir Hafnarhússins upplifi verkið á líkan hátt en hann segir það nú fullkomnað. Aðspurður um hvenær hann skynjaði að verkinu væri lokið segist Ragnar ekki geta svarað því.

Ragnar kveðst munu halda sínu striki, í bígerð er sýning í London og um næstu helgi mun hann fremja gjörning í tengslum við afhendingu Sjónlistarorðunnar ásamt Ásdísi Sif Gunnarsdóttur en þeim viðburði verður sjónvarpað beint frá Akureyri næstkomandi föstudag.

"Ég tek líka þátt í norður-evrópska tvíæringingnum Momentum en þar er ég með verk sem heitir Scandinavian Pain," útskýrir Ragnar og segir það verk til heiðurs svæðisbundnum tilfinningum sem skynja má í verkum Strindbergs, Ibsens og skandinavískri black-metal tónlist. Ragnar finnur bældri dramatík Skandinava heimili í hlöðu við norskan fjörð þar sem leikið var tónverk sem samið var í félagi við Ólaf Björn Ólafsson en Ragnar hóf einnig upp raust sína og söng í hlöðukjallaranum á meðan á gjörningnum stóð.

Stúka Hitlers verður áfram til sýnis í Hafnarhúsinu en verkið er hluti samsýningarinnar Pakkhúss postulanna sem stendur til 22. október.