Tattú-hátíð fær frábæra dóma

Tattú-rokkhátíð sem var haldin hér á landi dagana 8. til 11. júní fær góða fimm síðna umfjöllun í nýjasta tölublaði tattú-tímaritsins Prick.

Þar segir greinarhöfundur að hátíðin hafi tekist frábærlega enda haldin í ótrúlegu landi þar sem sólin skein allan sólarhringinn. "Ísland hefur aldrei verið á lista yfir þau lönd sem mig hefur langað að heimsækja en eftir þessa hátíð vil ég pottþétt fara þangað aftur," segir hann.

Á hátíðina, sem var haldin á Gauki á Stöng og Bar 11, mættu til leiks húðflúrunarmeistarar frá Bandaríkjunum, Danmörku og Íslandi sem sýndu og buðu upp á húðflúr á heimsmælikvarða fyrir gesti og gangandi. Einnig tróðu fjölmargar rokkhljómsveitir upp, þar á meðal Jan Mayen, Sign, Lokbrá, Dr. Spock og Morðingjarnir.

Greinarhöfundur var sérstaklega hrifinn af Dr. Spock og segir hana uppáhaldshljómsveitina sína í dag. Einnig minnist hann á Nevolution og segir hana í næstmestu uppáhaldi.

"Í heildina séð var þetta ein skemmtilegasta utanlandsferð sem ég hef farið í hvað varðar menninguna og íbúana. Ef konan mín myndi þola kuldann myndum við búa þar," segir hann. "Þetta er staður sem allir ættu að heimsækja, alla vega einu sinni."