Elísabet átti erfitt með sorgina

Ný kvikmynd Stephen Frears The Queen sló heldur betur í gegn á kvikmyndahátíðinni í Feneyjum en hún fjallar um viðbrögð konungsfjölskyldunnar við dauða Diönu prinsessu sumarið 1997. Helen Mirren leikur Elísabetu drottningu og hefur fengið mikið lof fyrir túlkun sína.

Myndin þykir veita einstaka sýn inní hvað fór fram innan veggja Buckingham þegar fregnir af bílslysinu bárust. Samkvæmt myndinni átti Elisabet í miklum erfiðleikum með að samsama sig með þeirri sorg sem greip bresku þjóðina og að það hafi verið Tony Blair sem tókst að sannfæra drottninguna um að svipta sig þeirra konungslegu tign sem Elísabet hefur ætíð talað fyrir.

Elísabet varð fyrir miklu aðkasti frá bresku þjóðinni vegna viðbragða sinna við dauða Díönu en Helen Mirren sagði við blaðamenn í Feneyjum að Elísabet hefði haldið að þjóðin þyrfti á sterkri konu að halda sem sýndi engar tilfinningar heldur væri jafn fjarlæg og hún væri alltaf. Ég held að ég muni aldrei skilja hvað gerðist þetta sumar, segir Mirren í hlutverki Elísbetar þegar hún ræðir við Tony Blair. Ég hef aldrei verið hötuð svona en ég vill bara halda mínum tilfinningum fyrir sjálfa mig. Það er það eina sem ég þekki, bætir hún við.

Fram kemur í myndinni að Tony Blair hafi sýnt konungsfjölskyldunni mikla virðingu og jafnvel litið á Elísabetu sem móðurímynd. Cherie Blair, eiginkona Tony, var hins vegar ekki jafn umburðarlynd gagnvart fjölskyldunni í Buckingham. The Queen er jafnframt hrósað fyrir mikinn húmor og fer þar Philip, eiginmaður Elísabetar fremstur í flokki. Honum hryllti við því að Diana fengi opinbera útför. Það verða bara hommar og stjörnur úr sápuóperum á gestalistanum.