Cruise biðst afsökunar

Tom Cruise hefur beðið leikkonuna Brooke Shields formlega afsökunar á því að hafa gagnrýnt hana fyrir að nota þunglyndislyf. Shields lýsti þessu yfir í spjallþætti Jay Leno. Hann kom til mín og bað mig að fyrirgefa sér, sagði Shields við Leno. Mér fannst þessi afsökunarbeiðni koma beint frá hjartanu og ég fyrirgaf honum þetta, bætti leikkonan við.

Cruise lét hafa eftir sér að honum þætti það næstum ógeðfellt að Shields hefði notað þunglyndislyf vegna fæðingarþunglyndis sem hún þjáðist af skömmu eftir fæðingu dóttur sinnar. Samkvæmt Vísindakirkjunni, sem Cruise aðhyllist, er það talið óheilbrigt að nota lyf og raunar er það stranglega bannað samkvæmt kenningum hennar.