Tom Cruise er mesta karlremban

Tom Cruise hefur verið kosinn mesta karlremban í Hollywood vegna afskipta sinna af ferli eiginkonu sinnar, Katie Holmes. Holmes var á góðri leið með að skapa sér stórt nafn í kvikmyndaborginni með framistöðu sinni í Batman Begins þegar hún kynntist Cruise og síðan þá hefur lítið til hennar spurst. Holmes eignaðist sitt fyrsta barn fyrir skömmu og sér nú um að ala stúlkuna Suri upp á heimili skötuhjúanna.

Nicole Kidman, sem var gift Cruise í rúman áratug, hefur sjálf viðurkennt að hafa sett sig í annað sætið til að ala upp börnin þeirra tvö, Connor og Isabellu. Síðan að Kidman skildi við leikarann hefur henni gengið allt í haginn í kvikmyndaleik sínum og er nú meðal virtustu leikkvenna í Hollywood.

Cruise hlaut nafnbótina á Ernie - verðlaunahátíðinni en þá eru útnefndar verstu fréttatilkynningar og yfirlýsingar ársins. Cruise hlaut nafnbótina Karlremba ársins fyrir yfirlýsinguna. Ég er búinn að setja Holmes á afvikin stað þar til fæðingin er yfirstaðinn þannig að engin getur náð til okkar.