Hættir við tónleika

Bítillinn fyrrverandi Sir Paul McCartney hefur hætt við að troða upp á fjáröflunarsamkomu í Los Angeles. Ástæðan er erfiður skilnaður hans við fyrirsætuna fyrrverandi Heather Mills.

Fyrir vikið hefur verið hætt við að halda samkomuna, sem átti að fara fram í október. Bæði McCartney og Mills hafa verið verndarar samtakanna Adopt-A-Minefield sem hefur staðið fyrir samkomunni undanfarin ár.

Alls söfnuðust 210 milljónir króna á samkomunni í fyrra. Hefur McCartney boðist til að láta fé af hendi rakna til samtakanna í sárabætur vegna fjarveru sinnar.

Mills og McCartney hafa frá árinu 2001 verið gestgjafar á samkomunni og hafa tónleikar McCartney átt stóran þátt í því hversu vel hefur tekist að safna peningum.

Mills og McCartney giftust árið 2002 en skildu í maí. Eiga þau nú í harðvítugum deilum um hversu mikinn pening Mills fái við skilnaðinn og um forræði yfir tveggja ára dóttur þeirra.