Takk fyrir að reykja

Umdeildasti iðnaður allra tíma, tókaksiðnaðurinn, er til umfjöllunar í kvikmyndinni Thank you for Smoking eftir hinn kornunga Jason Reitman sem skrifar sjálfur handritið eftir samnefndri bók Christophers Buckley.

Aaron Eckhart leikur Nick sem fær það erfiða hlutverk að kynna glæsileika þess að reykja sígarettur en á undanförnum árum hefur tóbaksiðnaðurinn mátt sitja undir stanslausum árásum vegna framleiðslu, og ekki síst markaðsetningu sinnar.

Nick er hins vegar snillingur í að beita allskyns fáránlegum rökum og snýr áhorfendum sínum í hringi. Sonur Nicks á erfitt með að skilja hvers vegna faðir hans er að kynna þetta hættulega fíkniefni og þegar falleg fréttakona svíkur Nick virðist sem veröld hans hrynji. Þó á eftir að reka einn nagla til viðbótar í líkkistu markaðsmannsins.

Auk Eckharts kemur fyrir fjöldi stórstjarna í myndinni og nægir þar að nefna Robert Duvall, Maria Bello og Katie Holmes.