Hörð barátta um Ljósanæturlagið

Kosning á Ljósalaginu 2006 stendur nú yfir á heimasíðunum ljosanott.isog ruv.is/poppland Kosningin hefur staðið yfir frá því á mánudag en henni lýkur á morgun. Alls bárust 85 lög í keppnina um Ljósalagið og hefur þátttakan aldrei verið meiri. Þriggja manna dómnefnd sá um að velja tíu bestu lögin að hennar mati og verða þau gefin út á geisladisk í lok vikunnar.

Meðal þeirra sem eiga lag í úrslitum í ár eru fjórir valinkunnir tónlistarmenn, þeir Jóhann G. Jóhannsson, Magnús Þór Sigmundsson, Bragi Valdimar Skúlason úr Baggalúti og Védís Hervör Árnadóttir.

Tilkynnt verður um sigurvegara keppninnar í Kastljósinu þriðjudaginn 29. ágúst. Sigurvegari keppninnar fær að launum 400.000 kr, annað sætið 150.000 kr og það þriðja 100.000 kr.

Hægt er að hlusta á lögin í heild sinni á ofangreindum heimasíðum. Hátíðin Ljósanótt verður haldin í sjöunda sinn dagana 31. ágúst - 3. september.