Fleiri matarbækur á leiðinni frá Nönnu

Matargúrú Íslands, Nanna Rögnvaldsdóttir, er að hætta á Gestgjafanum eftir farsælt starf á blaðinu, aðdáendum blaðsins til mikilla ama enda Nanna verið kjölfestan í blaðinu sem er eitt mest selda tímarit landsins.

Reyndar hóf Nanna störf hjá Iðunni fyrir tuttugu árum en þegar tímaritaútgáfan Fróði keypti það fyrirtæki fylgdi Nanna með í kaupunum, í fyrstu starfaði hún sem lausapenni en hefur verið fastráðin í fimm ár. Það má því segja að þetta sé í fyrsta skipti sem ég er í lausu lofti í tvo áratugi, segir Nanna sem segist ekki muna eftir neinu sérstöku atviki frá þessum tíma. Þetta hefur bara verið mjög skemmtilegt tímabil, útskýrir Nanna.

Matargúrúið segist ekki ætla að sitja með tvær hendur tómar en viðurkennir að hún ætli sér að taka sinn tíma í að íhuga hvað taki næst við. Fjölmörg spennandi tilboð hafi komið inná borð til sín en hún sé ákaflega þolinmóð. Ég er að þýða stóra matreiðslubók en meira er ekki fast í hendi, segir hún en viðurkennir að hana langi til að skrifa fleiri bækur um mat þannig að matgæðingar Íslands þurfa engu að kvíða þrátt fyrir brotthvarf hennar af Gestgjafanum.

Fróði flutti fyrir ekki margt löngu uppá Höfða eftir að hafa verið staðsett í nágrenni við miðbæ Reykjavíkur. Nanna segist því ekki eftir að sakna staðsetningarinnar sem slíkrar enda sé hún mikil miðbæjarmanneskja. Ég á hins vegar eftir að sakna alls þess góða fólks sem ég vinn með hér, segir hún.