Logi ágætlega sáttur við skeggið

Fréttamaðurinn Logi Bergmann Eiðsson sneri aftur á skjáinn í síðustu viku eftir að honum og eiginkonunni Svanhildi Hólm fæddist dóttir fyrir skemmstu. Talsverða athygli vakti að Logi Bergmann skartaði myndarlegu alskeggi þegar hann las fréttirnar á NFS, en hann hefur hingað til jafnan verið snyrtilega rakaður.

„Ég hef aldrei áður farið í svona langt frí. Þegar ég er í fríi nenni ég ekki að raka mig og þegar ég kom til baka ákvað ég að leyfa þessu að standa,“ sagði Logi Bergmann þegar Fréttablaðið náði tali af honum fyrir helgi. Þessi umskipti á útliti Loga hafa talsvert verið milli tannanna á fólki um helgina enda ekkert lítið mál þegar heimilisgestir upp á hvert kvöld breyta svona til. Viðbrögðin við þessum óvænta skeggvexti Loga hafa um margt minnt á það þegar Bogi Ágústsson, fréttastjóri á Sjónvarpinu, skipti um hárgreiðslu fyrir skemmstu eftir hafa í áraraðir skartað sömu greiðslunni.

„Viðbrögðin hafa verið alla vega,“ segir Logi Bergmann. „Ég veit eiginlega ekki hvort ég ætla að halda skegginu, ég þarf bara að gera það upp við mig. Vinnufélagarnir hafa látið í ljós mjög sterkar skoðanir og flestir hafa verið mjög jákvæðir. Ég er í það minnsta ágætlega sáttur við skeggið,“ segir Logi Bergmann Eiðsson.