Ritjöfrar biðja Potter vægðar

Metsöluhöfundurinn og skapari galdraveldisins sem kennt er við Harry Potter, J.K. Rowling, segist skemmta sér sem aldrei fyrr við að skrifa síðustu söguna um galdrapiltinn heimsfræga enda sé mesti þrýsingurinn af öxlum hennar nú þegar sér fyrir endann á ævintýrinu.

Höfundurinn er nú staddur í Bandaríkjunum þar sem hún tók þátt í góðgerðasamkomu ásamt rithöfundunum John Irving og Stephen King en haft er eftir þeim að þeir félagar hafi hitað upp fyrir Rowling enda hafi áhorfendaskarinn verið í yngri kantinum.

Dagblaðið The Guardian greinir ennfremur frá því að fyrrgreindir ritjöfrar hafi beðið galdradrengnum Harry Potter vægðar, minnugir þess að Rowling lýsti því yfir í vor að ástkær persóna myndi láta lífið í lok sögunnar.

Rowling kveðst vel á veg komin með síðustu bókina og lýsti því yfir að henni þætti ekki alltaf gaman að gera út af við persónurnar sínar. Hún áréttaði þó að þegar kæmi að hinum eiginlegu skrifum væri hún búin að taka út sorgina því dauðsföllin væru ákveðin með löngum fyrirvara.- khh