Hvað býr í þokunni?

Kvikmyndin Half Light segir frá rithöfundinum Rachel Carson sem flytur til smábæjar á SKotlandi eftir að fimm ára sonur hennar drukknar . Carson er buguð af sorg en þegar hún kynnist heillandi vitaverði er eins og hún sjái ljós í myrkrinu. Carson verður þess þó fljótt áskynja að ekki virðist allt sem sýnist en þráin eftir að fá son sinn aftur er skynseminni yfirsterkari.

Leikkonan Demi Moore fer með hlutverk Carson en hún hefur átt erfitt með að blása nýjum glæðum í kvikmyndaferil sinn. Moore varð fræg eftir leik sinn í kvikmyndinni St. Elmos Fire þar sem margar af helstu stjörnum níunda áratugarins voru leiddar saman. Hún bætti um betur með kvikmyndunum Ghost og A Few Good Men en síðan fór að halla undan fæti. Hún gæti þó verið að sjá fram á betri tíð því framundan eru kvikmyndir á borð við Bobby sem Emilio Esteves leikstýrir og Mr. Brooks með Kevin Costner og William Hurt í aðalhlutverkum.