Keppt um ný brjóst

Keppni danskrar heimasíðu hefur vakið blendin viðbrögð meðal heimamanna en verðlaunin eru ný brjóst.

Það er stefnumótasíðan scor.dk sem efnir til þessarar keppni í september þar sem sigurvegarinn getur valið um að láta stækka eða minnka brjóstin á sér. Femínistar í Danmörku eru æfir yfir þessari keppni og sagði Karen Hallberg hjá danska kvennasamfélaginu að þetta væri enn eitt dæmið um hvernig farið væri með kvenlíkamannn sem söluvöru. „Þetta er mjög undarleg keppni og þrátt fyrir að konum sé frjálst að taka þátt eiga afleiðingarnar eflaust eftir að verða hrikalegar fyrir sumar konur,“ sagði hún í samtali við vefsíðu Ekstrablaðsins.

Aðstandendur heimasíðunnar segja hugmyndina komna frá notendum en fjölmargir hafi sett sig í samband við síðuna og spurt hvort hún væri tilbúin að fjármagna brjóstaaðgerðir. „Síðastliðin tvö til þrjú ár höfum við fengið fyrirspurnir frá konum sem vilja ný brjóst og á netinu hefur fjöldi kvenna sett upp heimasíður þar sem óskað er eftir aðstoð til að fjármagna slíka aðgerð,“ segir Lars Castenlund, framkvæmdastjóri síðunnar.

Hann var hvergi banginn við gagnrýnendur keppninnar og sagði að nú væri árið 2006 einfaldlega runnið upp. „Og við verðum að muna að þátttakendurnir eru óánægðir með brjóstin sín og því er þetta mjög mikilvægt fyrir þá,“ bætti Lars við. „Ef við getum gert stúlkurnar hamingjusamari erum við ánægðir,“ sagði hann í samtali við Ekstrabladet. Þeim sem hafa í hyggju að kynna sér þessa keppni er bent á heimasíðuna en senda verður mynd af brjóstunum til að fá þátttökurétt. - fgg