Sumarlag frá Muse

Breska rokksveitin Muse er á fljúgandi ferð þessa dagana. Muse sendi frá sér plötuna Black Holes and Revelations fyrir nokkrum vikum og hefur platan fengið frábæra dóma víðast hvar. Nú hafa liðsmenn Muse tilkynnt hver verður næsta smáskífa plötunnar. Það er lagið Starlight og er áætlað að smáskífan komi út 4. september næstkomandi.

Lagið fer þó í spilun í útvarpi innan tíðar og því er spáð að það muni njóta mikilla vinsælda, enda er hér um hressan rokkslagara að ræða, sannkallaðan sumarsmell. Myndbandið við Starlight verður frumsýnt í byrjun ágúst. Muse fara á stórt tónleikaferðalag um Bretland í haust en ekki hefur enn heyrst af því að þeir hyggist snúa aftur til Íslands. Það væri þó ekki óvitlaust enda fylltu þeir Höllina með frábærum tónleikum árið 2003.