Zidane skyggði á Pitt

Sigurganga myndarinnar Zidane: Andlit 21. aldarinnar heldur áfram en hún gerði góða ferð á Toronto-kvikmyndahátíðina nýverið. Sigurjón Sighvatsson framleiðir kvikmyndina og þegar Fréttablaðið náði tali af honum var hann staddur í Kaupmannahöfn á leiðinni heim til Los Angeles.

Zidane var sýnd í Feneyjum fyrir skömmu þar sem hún keppti um Gucci-verðlaunin en tapaði naumlega fyrir Nick Cave og mynd hans The Propo­sition, segir Sigurjón. Síðan var hún sýnd í Toronto nýlega þar sem myndin sló gjörsamlega í gegn, bætir Sigurjón við en eitt stærsta blað Kanada, Globe and Mail, birti lofsamlega dóma um kvikmyndina og sagði þetta vera bestu íþróttamynd allra tíma. Þessi dómur hafði gríðarlegt vægi og umfjöllun um myndina var á forsíðunni á íþróttadálki blaðsins, segir framleiðandinn. Kvikmyndahátíðin í Toronto er ein stærsta söluhátíð kvikmyndaiðnaðarins og ganga myndirnar kaupum og sölum á hverju götuhorni. Fjöldi kvikmyndastjarna leggur leið sína til borgarinnar en þeirra stærst var vafalítið leikarinn Brad Pitt sem kom þangað til að kynna sína nýjustu mynd, Babel. Globe and Mail sagði reyndar að Pitt væri ekki stærsta stjarnan á hátíðinni heldur Zidane á hvíta tjaldinu, segir Sigurjón og hlær.

Myndin fékk mikla athygli dreifingaraðila þótt framleiðandinn viðurkenni að hún hafi selst nokkuð hægt til að byrja með. Okkur tókst loksins að selja myndina til Þýskalands og Ítalíu, segir Sigurjón og bætir jafnframt við að hann hafi búist við meiri áhuga frá Suður-Ameríku þar sem knattspyrnan er nánast trúarbrögð. Eftir velgengnina í Toronto fór hins vegar að bera á eftirspurn eftir myndinni þar, bætir Sigurjón við og lætur þess jafnframt getið að bandarískir aðilar hafi einnig verið áhugasamir um að kaupa myndina sem eru mikil gleðitíðindi fyrir Sigurjón enda fótboltinn ekki hátt skrifaður þar vestra.

Leikstjórar Zidane-myndarinnar hafa hug á því að gera aðra mynd um knattspyrnu og þá frá sjónarhóli áhorfandans og ætlar Sigurjón einnig að framleiða þá mynd. Þá er ég að vinna í kvikmynd með Kathryn Bigelow sem heitir Devil in the White City og er um einn fyrsta raðmorðingja Bandaríkjanna, útskýrir hann en samningar hafa náðst við Óskarsverðlaunahafann Adrien Brody um að taka aðalhlutverkið að sér. Einnig er verið að leggja drög að endurgerð norsku myndarinnar Elling sem Jay Roach ætlar að leikstýra, segir Sigurjón.