Ungt listafólk fær styrk

Listamennirnir Dodda Maggý Kristjánsdóttir og Ragnar Jónasson hlutu styrki úr minningarsjóði Guðmundu Andrésdóttur listmálara við hátíðlega athöfn um helgina.

Guðmunda lést árið 2002 en hún tilheyrir þeirri kynslóð listamanna sem á sjötta áratug síðustu aldar ruddi abstraktlistinni braut í íslenskri listasögu. Innan þess tjáningarforms þróaði hún persónulegan stíl sem gerir framlag hennar til íslenskrar samtímalistar bæði sterkt og áhrifamikið. Hún arfleiddi Listasafn Íslands, Listasafn Háskóla Íslands og Listasafn Reykjavíkur að listaverkum sínum.

Ráðstöfunarfé sjóðsins er raunvextir af höfuðstól og ákvað stjórn sjóðsins, sem er skipuð safnráði Listasafns Íslands, að ráðstafa að þessu sinni þremur milljónum króna sem deilast jafnt milli styrkhafanna tveggja.

Markmið sjóðsins er að hvetja og styrkja unga og efnilega myndlistarmenn til náms en hann styrkir að þessu sinni myndlistarnema til framhaldsmenntunar. Dodda Maggý mun hefja nám við Konunglegu Listaakademíuna í Kaupmannahöfn en Ragnar stundar sitt nám við Glasgow School of Arts.

Það er fyrst og fremst mikill heiður að hafa hlotið þennan styrk, segir Dodda Maggý, sem er að vonum ánægð með útnefninguna. Hún bætir því við að fjárhæðin komi sér líka vel því hún hefur verið starfandi myndlistarmaður frá því hún lauk námi í Listaháskóla Íslands árið 2004 en hefur lítið getað safnað sér í námssjóð á þeim tíma.

Verk hennar má nú sjá á samsýningunni Prójekt Patterson sem stendur yfir í Galleríi Suðsuðvestur í Reykjanesbæ en Dodda Maggý vinnur einkum með vídeó og tónlist. Ég blanda líka þessum miðlum saman, vinn með ólíkar stemningar og framvindu og bý til litlar sögur, segir hún. Dodda Maggý hefur haldið fáar sýningar hér á landi en sýnt þeim mun meira erlendis, til dæmis í París, New York og víðar í Bandaríkjunum en hún er nú á leið til Berlínar þar sem hún mun taka þátt í listahátíðinni Berliner Liste.