56 prósent telja að verðbólga aukist ekki

Flestir, eða 42 prósent, telja að verðbólga muni aukast á komandi ári, samkvæmt nýrri skoðanakönnun Fréttablaðsins. 32 prósent telja að verðbólgan muni dragast saman, en 26 prósent telja að verðbólgan muni standa í stað.

Samkvæmt mælingu Hagstofunnar á vísitölu neysluverðs var verðbólga í júní 8,0 prósent, sé miðað við síðustu 12 mánuði. Frá því í júní í fyrra hefur verðbólgan aukist verulega, en þá mældist hún 2,8 prósent á ársgrundvelli. Áður en könnunin var gerð höfðu ASÍ, Samtök atvinnulífisins og ríkið gert með sér samning til að tryggja stöðugleika í launaþróun, sem byggðist á því að launataxtar hækki um 15.000 krónur, skattar muni lækka um eitt prósentustig um næstu áramót, í stað tveggja, hækkun persónuafsláttar, hækkun vaxtabóta og að barnabætur verði greiddar þar til börn ná 18 ára aldri í stað 16 ára aldri áður. Þá hafði ríkisstjórnin tilkynnt að lánshlutfall og hámarkslán Íbúðar­lánasjóðs muni lækka, til að draga úr þenslu, þá verði nýjum framkvæmdum frestað og leitast verði við að ná samningum við sveitarfélög til að draga úr nýjum fjárfestingum. Þar sem þessar helstu aðgerðir ríkisstjórnarinnar til að draga úr verðbólgu höfðu verið kynntar má skoða niðurstöður könnunarinnar í því ljósi hvort fólk hafi trú á því að þessar aðgerðir muni hafa áhrif.

Konur hafa minnsta trú á því að það dragi úr verðbólgu á komandi ári, en 46,1 prósent þeirra sögðust telja að verðbólga muni aukast á árinu. 23,1 prósent kvenna sögðu að verðbólgan muni standa í stað og 30,8 prósent kvenna telur að draga muni úr verðbólgu.

Karlar hafa mesta trú á því að draga muni úr verðbólgu og segja 33,2 prósent þeirra að verðbólgan verði minni að ári. 29,0 prósent telja að verðbólgan verði eins og hún er í dag og 37,8 prósent karla telja að verðbólga muni aukast.

Íbúar höfuðborgarsvæðisins hafa aðeins minni trú á því að dragi úr verðbólgu á árinu en íbúar landsbyggðarinnar. 42,7 prósent íbúa höfuðborgarsvæðisins telja að verðbólga muni aukast, 25,5 prósent telja að hún muni standa í stað en 31,8 prósent íbúa höfuðborgarsvæðisins telja að hún verði minni að ári.

Þá telja 41,0 prósent íbúa landsbyggðarinnar að verðbólga muni aukast. 32,2 prósent telja að draga muni úr verðbólgu en 26,8 prósent að verðbólgan standi í stað.

Hringt var í 800 kjósendur miðvikudaginn 28. júní. Svarendur skiptust jafn eftir kyni og hlutfallslega eftir kjördæmum. Spurt var: Telur þú að verðbólga á komandi ári muni minnka, standa í stað eða aukast? 92,3 prósent aðspurðra tóku afstöðu til spurningarinnar.