Veruleg hætta skapaðist

Á föstudagskvöld var þyrla Landhelgisgæslunnar kölluð út til Vestmannaeyja til þess að flytja sjúkling til Reykjavíkur vegna þess að sjúkraflugvélin var ekki til staðar. Samkvæmt samningi við Heilbrigðisráðuneytið ber fyrirtækinu skylda til þess að hafa vélina ávallt til taks í Vestmannaeyjum en Elliði Vignisson, bæjarstjóri Vestmannaeyja, segir að það hafi ítrekað komið fyrir að vélin hafi ekki verið til staðar þegar þörf hefur verið á henni. Landsflug tók við sjúkrafluginu 1. janúar í ár en áður sinnti Flugfélag Vestmannaeyja því.

Gunnar Gunnarsson, framkvæmdastjóri Heilbrigðisstofnunarinnar, segir að á föstudagsmorgun hafi ung kona verið í fæðingu á stofnuninni og þar sem henni blæddi nokkuð var haft samband við Landsflug og beðið um að hafa flugvél til taks ef á þyrfti að halda. Þegar ekkert fréttist af vélinni um eitt leytið hringdi Gunnar aftur í Landsflug og fékk þær upplýsingar að vélin yrði send af stað um leið. Í eftirmiðdaginn var konan búin að fæða en læknar töldu ráðlagt að senda hana í aðgerð til Reykjavíkur vegna mikilla blæðinga. Enn var vélin ekki komin og því var hringt í þyrluna sem kom fljótlega og flaug með konuna til Reykjavíkur þar sem hún fór í aðgerð og að sögn Gunnars er hún við góða heilsu núna.

Ekki náðist í forsvarsmenn Landsflugs í gær.