Kláruðu 20 þúsund pylsur

Í gær var haldið upp á 120 ára afmæli Landsbankans með pompi og prakt. María Björk Ólafsdóttir framkvæmdastjóri afmælisnefndar Landsbankans sagði veisluhöld hafa heppnast vel og giskaði á að vel yfir 15 þúsund manns hafi verið í miðbæ Reykjavíkur þegar mest var. Bæði var boðið upp á afmælisköku og pylsur og hvorutveggja kláraðist, segir María, en kakan var 120 fermetrar og pylsurnar 20 þúsund talsins.

Afmælisveislan hófst með því að Björgólfur Guðmundsson bauð gesti velkomna en sýnt var beint frá athöfninni til þrettán útibúa Landsbankans á landsbyggðinni.

María segir að þátttaka á landsbyggðinni hafi einnig farið fram úr væntingum og víða hafi þurft að kaupa viðbót af pylsum fyrir veislugesti. Í tilefni afmælisins færði Reykjavíkurborg Landsbankanum 120 birkitré sem gróðursett verða við Reynisvatn og mun trjálundurinn fá nafnið Landsbankalundurinn.

María sagði að veisluhöldin í gær væru aðeins byrjunin á uppákomum afmælisársins því framundan eru 120 viðburðir í boði Landsbankans. Í dag verður opnuð sýning á Kjarvalsstöðum á myndum Kjarvals sem eru í eigu bankans en Landsbankinn hefur einnig opnað myndlistarvef þar sem sýnd eru verk eftir Kjarval og gefin umsögn um þau.