Seldu líkama sambýliskvenna

Sendiráð Bandaríkjanna á Íslandi hefur kynnt árlega skýrslu um mansal hér á landi. Í kjölfar skýrslunnar gaf Alþjóðahús frá sér yfirlýsingu um að beinar rangfærslur væri að finna í skýrslunni þar sem vitnað er í lögfræðing Alþjóðahúss. Í yfirlýsingunni kemur fram að um sé að ræða trúnaðarupplýsingar sem áttu sér stað á milli lögfræðings Alþjóðahúss og skýrsluhöfundar með því fororði að þær mætti ekki rekja til upplýsingagjafa.

Auk þess að vísa í lögfræðing Alþjóðahúss, Margréti Steinarsdóttur, var um beinar rangfærslur að ræða í skýrslunni. Í yfirlýsingunni er þó staðfest að í tveimur tilfellum hafi konur greint lögfræðingi Alþjóðahúss frá því að menn þeirra hefðu selt aðgang að líkama þeirra og að í þessum tilfellum hafi verið um að ræða konur sem fengu aðstoð við að losna úr ofbeldissamböndum.

Þær rangfærslur sem vitnað er til fjalla um konur sem búa við erfiðar aðstæður og er þeim líkt við þrælahald og sagt að hér séu oft á tíðum á ferðinni gullfallegar rússneskar konur á þrítugsaldri sem eru fluttar til Íslands af mönnum á sextugsaldri. Þessar konur vinni oft langan vinnudag, menn þeirra taki laun þeirra og selji aðgang að þeim. - hs