Rokkað saman í ráðuneytinu

Það var glatt á hjalla hjá ráðherrunum Sturlu Böðvarssyni og Magnúsi Stefánssyni þegar þeir tóku lagið saman í Hafnarhúsinu við Tryggvagötu á dögunum. Þeir rifjuðu upp gömlu árin í poppbransanum en Magnús var um tíma landsþekktur poppari og Sturla vinsæll á sveitaböllum.

Ég var alveg hættur þessu gítarglamri, segir Sturla, en svo tók konan mín sig til og gaf mér gítar í afmælisgjöf og þá fór ég að eiga meira við þetta. Nú þykir mér það alveg ómetanlegt að geta leitað á náðir tónlistarinnar til að hvíla mig á skarkala stjórnmálanna.

Magnús segist vera öllu háværari í sinni tónlistariðkun. Ég keypti mér nýlega trommusett og það er alveg firna gott að taka góða rispu á settinu þegar maður vill fá útrás. Svo er ekki laust við að mann klæi í fingurna þegar maður heyrir í þessum nýju hljómsveitum á böllunum, en lagavalið hefur eiginlega ekkert breyst frá því ég var að spila. Ég gæti einfaldlega stokkið upp á svið og tekið við.