Fannst hann vera snuðaður og reiddist

Lyfjaverð Þegar umræðan um verðkönnun ASÍ byrjaði varð ég reiður og fannst ég hafa verið snuðaður. Ég hefði getað sparað mér tæpar 1.500 krónur ef ég hefði farið í Garðs Apótek í stað Lyfja og heilsu, eða um 40 prósent, segir Erlendur S. Þorsteinsson, reiknifræðingur og íbúi í Kópavogi.

Erlendur hafði ekki orðið slæmur í bakinu frá 1998 þegar hann fékk slæmt kast miðvikudaginn 7. júní. Daginn eftir fór hann til læknis á Salastöð og fékk lyfseðil. Ég fór í Lyf og heilsu í sama húsi og fékk lyfseðilinn afgreiddan. Ekki var minnst aukateknu orði á að til væri ódýrara samheitalyf, Vostar S, ekkert fremur en að starfsmenn Lyfja og heilsu í Hamraborg buðu starfsmönnum ASÍ samheitalyf fyrir Voltaren Rapid í verðkönnun 13. júní, segir Erlendur.

Könnun ASÍ sýndi að verðmunur á frumlyfi og samheitalyfi með sömu verkun var allt að 69 prósent og að lyfjafræðingar sinntu ekki nógu vel þeirri skyldu sinni að benda á ódýrari samheitalyf. Erlendur reiknaði út að hann hefði getað sparað sér 1.500 krónur og fyrir þann pening er til dæmis hægt að kaupa fimm kaffibolla á kaffihúsi eða fara tvisvar í bíó.

Erlendur hefur geymt kvittunina en ekki haft samband við Lyf og heilsu. Það eru bara orð gegn orði, segir hann og mótmælir harðlega ummælum Hjalta Sölvasonar, framkvæmdastjóra Lyfja og heilsu, í Fréttablaðinu í vikunni. Erlendur telur að lyfjafræðingar standi sig alls ekki nógu vel við að benda á samheitalyf og nefnir annað dæmi máli sínu til stuðnings. Nákominn ættingi hans hefur þurft að kaupa kólesteról­lækkandi lyf reglulega. Eftir könnun ASÍ var henni boðið ódýrara samheitalyf í fyrsta skipti.

Það er miður ef svona hefur gerst, segir Hjalti Sölvason, framkvæmdastjóri Lyfja og heilsu. Við höfum átt viðræður við alla okkar leyfishafa sem stjórna okkar apótekum og brýnt fyrir þeim að bjóða samheitalyf. Við munum brýna það enn frekar fyrir þeim. Þessi umræða gerir það að verkum að viðskiptavinirnir verða enn meðvitaðri um þá valkosti sem þeir hafa í samheitalyfjum.