Bæturnar verða tekjutengdar

Ný lög um atvinnuleysisbætur taka gildi í dag. Samkvæmt þeim eiga einstaklingar nú rétt á tekjutengdum atvinnuleysisbótum fyrstu þrjá mánuði atvinnuleysis, sem nema 70 prósent af heildarlaunum viðkomandi, en þó aldrei hærri fjárhæð en 185.400 krónum á mánuði.

Það er stór breyting að taka upp tekjutengdar atvinnuleysisbætur, en þær hafa ekki verið áður, segir Gissur Pétursson forstjóri Vinnumálastofnunar.

Í umræðum á Alþingi í apríl síðastliðnum sagði Ingvi Hrafn Óskarsson, varaþingmaður Sjálfstæðisflokksins, að hærri bætur myndu draga úr hvata fólks til að leita að vinnu.

Þetta er auðvitað alltaf línudans, hvenær bótafjárhæðin fer að hafa áhrif á áhuga manna á því að fara af bótum og í hefðbundna vinnu. Flestir þeirra sem verða atvinnulausir verða það hins vegar í mjög skamman tíma og kannski bara einu sinni á starfsævinni. Þetta er gert til að fólk verði ekki fyrir hrapi í tekjum meðan á atvinnuleit stendur. Það er hins vegar okkar að tryggja að fólk sé í virkri vinnuleit og hafa eftirlit með því að svo sé, segir Gissur.

Þá taka í dag gildi lög um vinnumarkaðsaðgerðir. Markmið þeirra er að veita einstaklingum viðeigandi aðstoð til að verða virkir þátttakendur á vinnumarkaði og að stuðla að jafnvægi milli framboðs og eftirspurnar eftir vinnuafli í landinu.