Lækka um 50 milljónir á ári

Fóðurtollar verða afnumdir á hráefni til fóðurgerðar og tollur á fullbúnar fóðurblöndur lækkar um helming samkvæmt nýrri reglugerð landbúnaðarráðuneytisins. Breytingin tekur gildi 1. júlí.

Tollar á fóðri munu lækka um 50 milljónir króna á ári við þessa breytingu og mun það hafa áhrif til samsvarandi lækkunar á rekstrarkostnaði þeirra búa sem háð eru erlendu kjarnfóðri að því er kemur fram í tilkynningu frá landbúnaðar­ráðuneytinu.

Haraldur Benediktsson, formaður Bændasamtaka Íslands, segir þetta í samræmi við ályktun síðasta Búnaðarþings. "Þetta er búið að vera baráttumál kúabænda um nokkurt skeið." Að sögn Haralds er ályktunin málamiðlun tveggja sjónarmiða. "Þessum tollum hefur verið ráðstafað aftur til bændanna í gegnum þróunar- og rannsóknarfé. "Svínabændur vilja taka það af sínum tekjum í kjölfarið á þessari breytingu og það á væntanlega einnig við um kúabændur." Halldór ítrekar einnig að um samningsverðmæti í milliríkjaviðskiptum sé að ræða. "Þannig að einhliða niðurfelling eða lækkun er kannski ekki alltaf góð. En þetta var niðurstaða Búnaðarþings og meiri samkeppni á fóðurmarkaði er vissulega æskileg."