Mætti strax aftur til vinnu

Sundlaugin á Eskifirði var opnuð aftur í gær eftir að hafa verið tæmd og hreinsuð vandlega vegna klórgasmengunarinnar frá því á þriðjudaginn. Margir lögðu leið sína í laugina yfir daginn og enginn beygur var í fólki vegna slyssins að sögn Andra Bergmanns Þórhallssonar sundlaugarvarðar.

Það er gott hljóðið í fólki og ég efast um að slysið muni draga úr sundlaugarferðum. Það eru kannski einhverjir krakkar sem eru smeykir en það líður örugglega hjá.

Andri var einn þriggja sundlaugarvarða sem voru á vakt þegar slysið varð og fékk mestu eitrunina af þeim. Andri var seinasti maður út úr sundlaugarbyggingunni þegar hún var rýmd vegna eitrunarinnar og andaði því að sér töluverðu af klórgasinu. Við hlupum um allt hús og gengum úr skugga um að allir væru farnir út.

Andri fór ekki á heilsugæsluna fyrr en einum og hálfum tíma síðar og var þá strax sendur með sjúkrabíl til Neskaupstaðar. Þetta var að ágerast smám saman og verstur var ég um nóttina.

Andri segist hafa náð að halda ró sinni allan tímann og hefur enn ekki orðið var við spennufall. Mér líður ljómandi vel núna fyrir utan smá eymsli í lungum, segir Andri sem mætti galvaskur til vinnu um leið og sundlaugin var opnuð á ný.