Vildi skemmta sjálfum sér

Tónlistarmaðurinn Einar Tönsberg hefur gefið út sína aðra sólóplötu, Voff Voff, undir listamannsnafninu Eberg. Freyr Bjarnason spjallaði við Einar, sem er kominn með annan fótinn til Íslands.

Fyrsta sólóplata Einars, Plastic Lions, kom út fyrir tæpum þremur árum hér heima og fékk prýðilegar viðtökur. "Hún gekk mjög vel ytra og var grundvöllur fyrir mig til að halda áfram og gera næstu plötu sem er Voff Voff," segir Einar, sem var í hálft ár að "dútla" í henni. "Ég vildi gera skemmtilega plötu, vildi skemmta sjálfum mér. Mig langaði mest til að pirra fólk og ekki gefa því mikinn frið því mér finnst svoleiðis tónlist sjálfur skemmtileg," segir hann.

Framsækinn fartölvu-trúbadorAð sögn Einars er nýja platan agressívari en um leið aðgengilegri en Plastic Lions. "Hún er í sjálfu sér eðlilegt framhald af henni. En mér þykir rosalega vænta um hina plötuna en það tók svolítinn tíma að komast inn í hana. Hún var samt gerð á svipuðum forsendum," segir hann.

Platan hefur þegar fengið góða dóma og fékk til að mynda fjórar stjörnur af fimm mögulegum í vefútgáfu enska blaðsins The Independent. Þar segir að með Plastic Lions hafi Einar stimplað sig inn sem einn framsæknasti fartölvu-trúbador heims með lögum um ljón, seli og reykjandi kvikmyndastjörnur. Nýja platan byggi á svipuðum grunni en þó sé kjötið töluvert meira á beinunum en áður. Níu ár í LondonEinar hefur búið í London undanfarin níu ár en áður en hann fluttist út var hann m.a. meðlimur hljómsveitarinnar Cigarette með söngkonuna Heiðrúnu Önnu Björnsdóttur í fararbroddi. Gaf sveitin út plötuna Double Talk árið 1995. Eftir að því ævintýri lauk fluttist Einar út og hefur allar götur síðan starfað sem upptökustjóri og útsetjari.

Hann gekk til liðs við hljómsveitina Lorien sem gerði útgáfusamning við Sony og gaf út plötu árið 2001. Ekkert varð af frekari sigrum hennar og því ákvað Einar að einbeita sér að sólóferli sínum, sem hefur nú getið af sér tvær plötur. Voff Voff kemur út í Bretlandi á vegum útgáfufyrirtækisins Instant Karma en hér heima á vegum 12 Tóna. Tónleikar á Isle of WightEinar segist vinna meira og minna einn í tónlistinni sinni en fá aðstoð frá áströlskum trommara og enskum sellóleikara á tónleikum. "Það besta við það að vera einn er að maður ber alla ábyrgð sjálfur og það er ekki hægt að kenna neinum öðrum um neitt. Maður gerir það sem maður vill gera og verður að taka við hrósi eða skömmum. Ég myndi samt ekki nenna að spila einn á tónleikum, það er meira félagslegt."

Einar mun spila á Íslandi í ágúst til að fylgja plötunni eftir. Í september kemur hann síðan fram á tónlistarhátíðinni Bestival sem verður haldin á Isle of Wight í Bretlandi. Á meðal annarra sem munu troða þar upp eru Hot Chip, Kid Carpet, Pet Shop Boys, The Stranglers, The Fall, Devendra Banhart og Jim Noir. Orðinn mettaðurÞrátt fyrir að vera búinn að festa sig vel í sessi í London er Einar orðinn þreyttur á verunni ytra og býst við að flytja aftur heim á næstunni. "Ég er orðinn mettaður, ég verð að viðurkenna það," segir hann. "Maður er kominn með annan fótinn heim og er farinn að leita að afsökunum til að vera þar. Ég hugsa að það sé ekki langt í mann. Loksins þegar maður er búinn að koma sér vel fyrir þá hleypur maður í burtu," segir hann og hlær. "Þetta er búið að vera ljómandi gott úti, annars væri maður ekki búinn að ílengjast þar svona lengi. Það er æðislegt að vera tónlistarmaður þarna. Það er svo mikið að gera og svo getur maður lifað af þessu, það finnst mér það skemmtilegasta af öllu." Þriðja platan í vinnsluEinar er þegar byrjaður að vinna að sinni þriðju plötu en þess á milli ætlar hann vinna baki brotnu við að byggja sér sumarbústað heima á Íslandi.