Styttra milli ferða á háannatímum

Leiðakerfi strætisvagna á höfuðborgarsvæðinu hefur verið gjörbylt og verður nýja kerfið tekið í notkun laugardaginn 23. júlí. Það miðar að því að koma farþegum á milli hverfa á sem stystum tíma og verða farnar ferðir á tíu mínútna fresti á háannatímum á sex stofnleiðum sem aka með fáum stoppum á milli helstu íbúðar- og atvinnuhverfa. Nýja leiðakerfið er fyrsta raunverulega samræmda leiðakerfi almenningssamgangna á höfuðborgarsvæðinu en þegar byggðasamlagið Strætó var stofnað árið 2001 var steypt saman leiðakerfum sveitarfélaganna sem að því stóðu og hefur það kerfi ekki tekið stórkostlegum breytingum, fyrr en nú. Strætóleiðir hins nýja leiðakerfis skipast í þrjá flokka; sex stofnleiðir sem eru eins konar hraðleiðir sem ganga milli hverfa, sex almennar leiðir sem ganga innan fjölmennra hverfa og tengja þau saman, allar með viðkomu í miðborg Reykjavíkur og einnig sjö hverfaleiðir sem ganga eingöngu innan borgarhverfa eða sveitarfélaga án viðkomu í miðborginni. Ásgeir Eiríksson forstjóri Strætó bs. sagði á blaðamannafundi í gær þar sem leiðakerfið var kynnt að strætó yrði með nýja leiðakerfinu raunhæfari valkostur en áður þegar kemur að því að velja sér samgöngumáta og að ferðatími muni almennt styttast. Björk Vilhelmsdóttir borgarfulltrúi og stjórnarformaður Strætó bs. sagði að í sumum tilfellum ætti strætó, með auknum forgangi svo sem eins og á sérakrein á Miklubraut, að geta orðið fljótari á milli staða en einkabíllinn. Markmiðið væri að þjóna betur þörfum fólks í umferðinni en hingað til hefur verið gert og að gera strætó að góðum, ódýrum og umhverfisvænum ferðamáta fyrir almenning. Ljóst er að notendur strætisvagna eiga sumir hverjir eftir að lenda í einhverjum vandræðum á meðan þeir læra á nýtt kerfi og er rétt að benda þeim á að hægt er að kynna sér nýja leiðakerfið á vefsíðunum bus.is og strætó.is og í þjónustunúmeri Strætó bs., 800 1199. Einnig liggja frammi bæklingar með upplýsingum um leiðakerfið á skiptistöðvum.