Sölu hætt á Gerber barnagrautum

Sölu og dreifingu á barnagrautum frá bandaríska framleiðandanum Gerber hefur verið hætt hér á landi og skýrir það hvers vegna sú vara fyrirfinnst ekki lengur í hillum verslana. Ástæðan er sú að varan uppfyllir ekki reglugerð Evrópusambandsins um járninnihald í barnamat en þær kröfur eru mikið mun harðari en í Bandaríkjunum. Hefur innflutningsaðili Gerber, Íslensk-ameríska, fengið aðlögunartíma sem nú er liðinn og munu barnagrautarnir því ekki fást hér á landi aftur. Aðrar vörur fyrirtækisins verða þó áfram í sölu.