Sjálfsmorðsárás í leikhúsi í Katar

Óttast er að hryðjuverkasamtökin al-Qaida hafi látið til skarar skríða í Katar í morgun. Sjálfsmorðsárásarmaður grandaði einum Breta með því að aka bíl hlöðnum sprengiefni inni í leikhús. Staðfest er að árásarmaðurinn var frá Egyptalandi og talið er að ætlunin hafi verið að granda vestrænu fólki því í leikhúsinu var verið að sýna leikritið Þrettánda nóttin eftir Shakespeare. Um hundrað manns voru í leikhúsinu, flestir útlendingar, og að auki er leikhúsið rétt hjá stórum enskumælandi skóla í Doha, höfuðborg Katars. Um sextán aðrir slösuðust í árásinni, nokkrir alvarlega. Menn beina sjónum sínum aðallega að al-Qaida enda eru aðeins tveir dagar síðan leiðtogi samtakanna í Sádi-Arabíu hvatti menn til að gera árásir á vestræn skotmörk og vestrænt fólk á Persaflóasvæðinu. Þetta er í fyrsta sinn sem sjálfsmorðsárás er gerð í Persaflóaríkinu Katar en stjórnstöð Bandaríkjahers er staðsett þar. Mikill ótti hefur gripið um sig meðal Vesturlandabúa á svæðinu og hefur nokkrum enskumælandi skólum verið lokað í kjölfarið.