Svindlaði Björgólfur á kerfinu?

Björgólfur Takefusa leikmaður Fylkis hefur leikið með félaginu undanfarin 2 ár, samningslaus hvað KSÍ varðar. Björgólfur sem kom frá Þrótti á sínum tíma skrifaði undir 3 ára samning við Árbæjarliðið sem hins vegar skilaði samningnum aldrei inn til KSÍ eins og reglur kveða á um. Öðrum félögum er því heimilt að tala beint við leikmanninn hafi þau áhuga á að fá hann til liðs við sig en þetta kemur fram í DV í dag. KR hefur mikinn áhuga á að fá Björgólf í sínar raðir og hafa forráðamenn Vesturbæjarliðsins óskað eftir viðræðum við hann en þeim óskum var hins vegar hafnað. Engar reglur KSÍ geta komið í veg fyrir að Björgólfur semji við annað félag fyrirvaralaust. Kristinn Kjærnested stjórnarmaður í KR-sport staðfestir þetta í viðtali við DV-sport í dag en aðspurður um hvort KR hafi haft beint samband við Björgólf svaraði Kristinn: "Ég vil að öðru leyti ekki segja meira um þetta mál." Samkvæmt heimildum blaðsins mun Björgólfur hafa farið fram á að samningnum yrði ekki skilað inn vegna skilyrða á þeim námsstyrk sem hann fékk þá fyrir háskólanám í Bandaríkjunum. Samkvæmt þeim skilyrðum mátti Björgólfur ekki fá neitt, hvorki greiðslur né önnur fríðindi frá neinum aðila, þar með talið Fylki. DV hefur reyndar heimildir fyrir því að Björgólfur hafi ekki spilað án greiðslu síðstliðin 2 ár með Fylki. Aðspurður sagði Geir Þorsteinsson, framkvæmdastjóri KSÍ að refsingar við brotum á reglum KSÍ séu metnar í hverju tilfelli fyrir sig. Nánar er fjallað um málið í DV í dag.