Fóstureyðing jákvæð lífsreynsla?

Bæklingur frá Landspítalanum um fóstureyðingar hefur verið sendur í endurskoðun eftir að yfirlækni kvennasviðs var bent á óskiljanlega setningu í honum. Á blaðsíðu átján í bæklingnum um fóstureyðingar, sem gefinn er út af kvennasviði Landspítalans, var óskiljanlega setningu að finna en hún hefur nú verið fjarlægð. Þar sagði að fóstureyðing geti allt eins verið konu uppspretta jákvæðra tilfinninga eins og aukins sjálfstrausts og þroska. Hildur Harðardóttir, yfirlæknir kvennasviðs, segir að bæklingurinn hafi verið unninn af félagsráðgjöfum sem áður störfuðu á kvennadeildinni. Eðlilegt sé kannski að endurskoða bæklinginn svo hann sé unninn af fólki sem nú starfi á deildinni. „Ég skal ekki segja hvað þeir voru að hugsa sem settu (setninguna) þar inn en ég tók hana út af netútgáfunni og setti bæklinginn í endurskoðun,“ segir Hildur.