Þora ekki til Bolungarvíkur

"Bolvíkingar láta sig nú flestir hafa það að keyra undir Óshlíðinni þótt þeir séu nú meðvitaðir um þá hættu sem því fylgir, en ég tel að fáir aðrir geri sér ferð til Bolungarvíkur eins og ástandið er," segir Jónas Guðmundsson, sýslumaður í Bolungarvík og formaður Almannavarnanefndar. Einn þeirra sem þó lét sig hafa það að fara um Óshlíð var Kristinn H. Gunnarsson, þingmaður Framsóknarflokksins, en hann var hætt kominn síðasta laugardag: "Ég var þarna á ferð rétt fyrir klukkan átta og þá hafði fallið grjót þarna á veginn og það munaði bara nokkrum mínútum að ég eða einhver annar hefði orðið fyrir." Kristinn hefur rætt við Guðna Ágústsson, varaformann Framsóknarflokksins, sem mun ræða hugsanlega gangagerð á svæðinu á næsta ríkisstjórnarfundi. "Það er mjög aðkallandi að það verði gerð göng um Óshlíð og ríkisstjórnin getur brugðist við því, það er vitað hvað þetta kostar og hvernig má gera þetta svo málið er bara pólitískt," segir Kristinn. Hann segir að göngin myndu kosta um það bil tvo og hálfan milljarð. Kristinn spurði samgönguráðherra um viðhorf hans til gangagerða á svæðinu í fyrirspurn á Alþingi síðastliðið vor: "Hann var þá ekki sammála mér um það að málið væri aðkallandi og ég var ekkert kátur með það." Almannavarnanefnd Bolungarvíkur kom saman í gær til að ræða það hættuástand sem íbúar á svæðinu búa við en margir Bolvíkingar sækja vinnu og þjónustu til Ísafjarðar. Í skýrslu sem jarðfræðingurinn Esther Hlíðar Jensen og snjómælingamaðurinn Jóhann Hannibalsson unnu fyrir tveimur árum segir að talsverð hreyfing sé á 30 til 40 metra langri sprungu efst í Óshyrnufjalli sem færist í aukana og ástæða sé til að óttast að allstór stykki geti hrunið úr brúninni yfir veginn og í sjó fram. Birna Lárusdóttir, forseti bæjarstjórnar Ísafjarðarbæjar, segir að á fjórðungsþingi Vestfirðinga sem haldið var í byrjun mánaðarins hafi verið lögð fram ályktun um að göng verði gerð á svæðinu því ekki verði unað við þetta hættuástand.