Vantar 60 starfsmenn

Norðurál á Grundartanga auglýsir á næstu vikum 60 laus störf við álverið. "Það skapast 50 ný störf fyrir ófaglærða og tíu störf iðnaðarmanna þegar stækkað álver verður tekið í gagnið," segir Ragnar Guðmundsson, framkvæmdastjóri fjármálasviðs Norðuráls. Þegar stækkunin verður orðin að veruleika verða starfsmenn álversins um 340. Að sögn Ragnars er Norðurál vinsæll vinnustaður en það má meðal annars merkja á því að reglulega berast umsóknir um störf þó að ekki sé auglýst eftir fólki. Karlar eru mikill meirihluti starfsmanna en markvisst er unnið að fjölgun kvenna í álverinu. "Við höfum séð í öðrum álverum að konur eru um það bil fimmtán prósent starfsmanna en hjá okkur eru þær nítján prósent. Við viljum gera enn betur," segir Ragnar. Norðurál leitar jafnframt að nýjum framkvæmdastjóra starfsmannasviðs en Kristján Sturluson sem gegnt hefur starfinu undanfarin ár hefur verið ráðinn framkvæmdastjóri Rauða kross Íslands.