Búa til ágreining

"Ég bið menn nú að oftúlka ekki mín orð. Þessi umræða hefur ítrekað farið fram innan þingflokksins," segir Hjálmar Árnason, þingflokksformaður Framsóknarflokksins. "Forsætisráðherra var á leiðtogafundi Sameinuðu þjóðanna einvörðungu að árétta það sem áður hefur komið fram, meðal annars hjá Geir Haarde fyrir ári þegar hann ávarpaði þing Sameinuðu þjóðanna sem staðgengill Davíðs Oddssonar utanríkisráðherra. Halldór Ásgrímsson minnti á það að Íslendingar eru opnir fyrir því að sækja um aðild að öryggisráði Sameinuðu þjóðanna." Hjálmar segir að allar þjóðir í vestanverðri Evrópu utan þrjár hafi tekið sæti í öryggisráðinu. "Þetta eru Ísland, Lúxemborg og Liechtenstein. Lúxemborg hefur ákveðið að bjóða sig fram til setu í ráðinu og ég minni á að til dæmis hafa Grænhöfðaeyjar átt þar sæti. Spurningin er sú hvort við séum með einhverjum hætti hafin yfir aðra og ættum að víkjast undan þessari ábyrgð." Hjálmar segir hitt sjónarmiðið snúa að kostnaðinum við framboðið. "Okkar formaður hefur haft fullan stuðning til þess að fylgja þessu eftir með opnum huga, meðal annars að skoða hverju þurfi til að kosta. En menn geta spurt þegar upphæðin liggur fyrir hvort fjármunum sé betur varið til annarra hluta, til dæmis þróunaraðstoðar." Aðspurður um það hvort málið sé í uppnámi og um það sé mikill ágreiningur innan Framsóknaflokksins segist Hjálmar ekki líta svo á. "Vandinn er sá hvernig fjölmiðlar hafa fjallað um málið og stjórnarandstaðan er að reyna að búa til alvarlegan ágreining um málið milli stjórnarflokkanna. Það er mikil einföldun á málinu." Hjálmar telur málið í eðlilegum farvegi. "Um þetta verður fjallað í þingflokknum og nefndum þingsins og á þinginu fær það eðlilega umræðu," segir Hjálmar Árnason.