3-4% ungra kvenna með átröskun

Á milli þrjú og fjögur prósent kvenna undir þrítugu þjást af átröskun af einhverju tagi. Á málþingi í dag mátti heyra átröskunarsjúklinga segja sína sögu. Málþingið fór fram í Loftkastalanum en það voru samtökin Forma, samtök átröskunarsjúklinga, sem stóðu fyrir því . Á málþinginu talaði meðal annars Karen Bro, sem er danskur meðferðarsérfræðingur. Karen hefur rekið meðferðarheimilii fyrir átröskunarsjúklinga í Danmörku og flutti erindi um mikilvægi þess að skyggnast inn í huga sjúklinganna. Hingað til hefur ekki verið starfrækt sérstök göngudeild vegna átröskunarsjúkdóma á Landspítalanum. Síðastliðin fjögur ár hefur hins vegar farið fram mikil vinna hjá hópi fólks sem hefur viljað sjá þessu breytt. Vonast er til þess að breyting verði á þessu í haust. Verndari málþingsins er Vigdís Finnbogadóttir en samtökin Ímynd ætla sér að gera málþingið að árlegum viðburði.