Tengjast kerfi Neyðarlínunnar

Farsímanotendur, sem skipta við Og Vodafone, tengjast staðsetningarkerfi Neyðarlínunnar á næstu tveimur mánuðum. Eftir það búa þeir við sama öryggi og viðskiptavinir Landssímans. Og Vodafone og Neyðarlínan hafa undirritað samning sem gerir Neyðarlínunni kleift að staðsetja farsímanotendur Og Vodafone á rauntíma. Þar með búa þeir við sama öryggi og farsímanotendur sem skipta við Landssímann. Um 270 þúsund farsímanúmer eru í notkun alls og tæknin býður nú upp á að hægt sé að staðsetja alla farsímanotendur um leið og þeir hringja í 112.  Kristján Hoffmann, gæðastjóri Neyðarlínunnar, segir tæknina hafa skipt sköpum í óteljandi tilfellum og hann voni að viðbótin frá Og Vodafone eigi eftir að koma að enn meira gagni Sjóslysið á Viðeyjarsundi vakti menn til umhugsunar um að ekki væri unnt að staðsetja farsíma viðskiptavina Og Vodofone með eins fljótvirkum hætti og tæknin í raun býður upp á. Þessi annmarki er þó ekki talinn hafa tafið fyrir björguninni. Neyðarlínan hefur ýtt á Og Vodafone að tengjast staðsetningarkerfinu frá árinu 2002. Ekki komst hreyfing á málið fyrr en í þessari viku þegar símafyrirtækið var gagnrýnt í fjölmiðlum fyrir aðgerðarleysi.  Kristján segir ávinninginn af samningnum augljósan. Hann þýði meira öryggi fyrir alla landsmenn.